【見番個 Ex ...... 師弟】

#見番個Ex #師弟我嗰team搞嗰個中學生創業體驗啱啱結束，其中一隊熱門，雖然「失落」冠軍，但係都好認真咁安排股東大會。我獲邀出席，聽同學交待銷售過程、財務報告、派息… 喺最後一輪發言，一個熟口熟面，但係我又噏唔出名嘅老師眼神示意問我有冇嘢想講… 我作為比賽主辦單位嘅負責人，正路梗係講：恭喜你地攞咗第二，其實奬項其次，過程同學習機會先重要，大家俾啲掌聲自己先啦… 正路梗係講呢啲啦…(我個腦不斷push啲台詞去我把口…) 但係支咪傳緊嚟之際，我記起我目睹當日宣布賽果之後班同學嘅失望，我大概講咗以下呢番話：「…其實想你地記番當日聽到賽果後嘅心情…係咪好失望…? (台上同學擺出副唔知我想點嘅表情…) 唔好意思，我唔係想好客氣咁叫你地：忘記佢，下次嚟過…相反，想你記住呢個感覺，再問自己，如果幾個月前，知道係會輸嘅，你仲參唔參加？」「如果都參加嘅，即係件事本身可以為你帶嚟滿足感、快樂…」「相反，要有獎或者外在肯定，你先想做嘅嘢…其實就唔會係每朝令你好想起身，期待每日有48小時嘅生活…」「高中畢業之後，你會越嚟越多自由去決定每日點過，究竟自己嘅鋪排重點放喺追求外在物質同其他人嘅讚賞？定係勇於發揮自我嘅內在滿足感呢？人生有好多決定等緊你，listen to your heart...」當然，唔係非黑即白，大部分人都需要平衡，需要喺「窮得只剩錢」同「心中富有」之間揾自己嘅位置… 但係自覺有呢一個角力，已經係一大步。後記：股東大會完結，我同開頭我話熟口熟面嗰位老師傾計，原來佢係我中學師弟…細我幾年…上次見佢應該係佢仲未發育…之後去另一間中學分享又撞到另一個師弟，都係由小朋友變成一個好有心嘅老師，幅相係嗰日訪問影嘅。 #Day134