【香港精英運動員、精英爸爸、精英老公 - 黎志偉】

黎志偉 CHI WAI LAI，香港攀石運動員，亞洲冠軍，最高世界排名第八。

早幾日有幸聽佢親身分享，早期訓練嘅辛酸、家人擔心前途、貼錢參賽等等不在話下…

當佢喺努力過後嘅收成期，有事業有家庭，仔仔喺老婆肚入面七個月大嘅時候…

佢遇到一次車禍…醫生話佢下半世都要坐輪椅…

佢話佢當時用咗三日去接受自己，勸自己唔好放棄：

因為佢要見到個仔出世、

因為佢唔想老婆擔心、

因為佢想個仔大個唔會因為爸爸身體有事而自卑。

之後志偉再分享咗啲坐輪椅嘅軼事：包括殘廁俾人霸住打機、地鐵電梯排隊俾「趕住返工」嘅人打尖 (留意：唔係話啲人唔讓輪椅人事行先，係講緊打尖…)，希望多啲人留意有需要嘅人。

仲有佢坐輪椅爬獅子山同遲啲挑戰IFC唔多講啦 (因為之後佢有套documentary!)

分享完咗，即場有佢嘅書賣，籌到嘅錢會幫佢買一對機械腳…

我心諗：分享加賣書，指定動作啦，慢條斯理咁行過去counter…點知眨下眼排咗三四百人 (估計原本有大約一千人聽分享)…

我嗰一刻其實係有啲感動，覺得其實好多人都肯出錢出力幫人(縱使我相信在場大部份都係前線員工，未必係高收入一羣…），我地做慈善/社企想多啲人幫手，要努力「辦」好事，多過「扮」好事，好心人好易感受到我地嘅出發點…我需要好好記住。

多謝志偉嘅教導！

#黎志偉 #香港精英運動員 #精英爸爸 #精英老公 #期待紀錄片八月上畫